Ikasgaiean landutako tresnen balorazioa

Ikasgai honetan zehar ikusi ditugun tresnen artean bloga, wikia, google docs, sites eta slideshare-a daude. Horietatik bloga izan da gehien erabili duguna, bertan egin ditugulako hausnarketak  besteak beste. 

Ondorengo lerroetan tresna bakoitzaren balorazioa egingo dugu:

Blog-a:

Ezaguna zen guretzat (taldekide batek jada bazuen bere futbol taldearena) eta ondorioz ez dugu aparteko zailtasunik izan. Hezkuntzarako erabilgarria den tresna bat iruditzen zaigu, ikasleari interneten ibiltzea oztopatu gabe,  bere ikasketak aurrera eraman ditzakelako blog-a modu egokian

 erabiliz.

 Gainera irakasleentzat ere erabilgarria izan daitekeela pentsatzen dugu, beste irakasle eta hezkuntzako adituekin kontaktuan egoteko  balio duelako (beraien esperientzien berri izan, informazioa jaso, ariketak proposatu etab.).

 Google docs:

 

Ezezaguna genuen tresna hau eta oso interesgarria iruditu zaigu batez ere talde lanak egiteko. Gainera beste ikasgaietako lanak egiteko baliagarria izan zaigu. Tresna oso erabilgarria da hezkuntzan ikasleen talde lanetarako, taldekide bakoitzak eraldatu dezakeelako dokumentua. Hala era, irakasleentzat ez diogu erabilgarritasun handirik ikusten, taldeko erabakiak hartzeko bilerak egitea aproposena iruditzen zaigulako. 

Tresna honi ikusten diogun arriskurik handiena, indibidualismoa bultza dezakeela da. Azken finean, taldekideak denbora izanez gero, lana egiteko elkartzea egokiagoa da.

Wiki-ak:

Tresna hau ere ezezaguna zen guretzat, nahiz eta wikipedia ezagutu. Hezkuntzan erabilgarria suertatu daiteke ikastetxeen arteko elkarrekintza bultzatzeko. Horrela, ikasleek beren lanak interneten eskegi ditzakete gainontzeko ikasleek ikus dezaten eta parte hartu dezaten. Hezkuntzatik kanpo ere, kultura aberasteko balio du, adibidez, jendeak proposaturiko liburuak eta hauen balorazioak ezagutzeko.

Sites:

Aurretik ezagutzen genituen tresna batzuen antzekoa da, msn spaces, blogger... Hori dela

 eta, besteak erabiltzen ditugunez, ez zaigu hain erabilgarria egin.

Slideshare:

Tresna hau ere ez genuen ezagutzen eta egokia iruditu zaigu blog eta beste orri batzuetan power pointak eta bestelako dokumentu batzuk igotzeko. Horrela, blogak kreatiboago eta pertsonalizatuago bihur daitezke.

Esan beharra dago, gure adinarengatik agian, ohituta gaudela antzeko tresnak erabiltzera, hala nola, fotolog-a, facebook, tuenti, myspace... Hori dela eta, ez zaigu zaila egin klasean ikusitakoen funtsa ulertzea. Hala eta guztiz ere, batzuk ( docs, wikia eta slideshare) ezezagunak ziren guretzat eta oso erabilgarriak iruditu zaizkigu.

Joko didaktikoen jardueraren hausnarketa

Jarduera honetan bi joko didaktiko aztertu eta baloratu ditugu (Giza gorputza eta Errefuxiatuak) guk ezarritako irizpide batzuk jarraituz. 

Horretarako, lehenik software hezigarriei buruzko bi testu irakurri genituen bakarka (Concepción del software educativo. Marqués P. (2001) eta Concepción del software educativo desde una perspectiva pedagógica. Ríos, P. (2001)).

 Ondoren, irakasleak joko didaktiko batzuk utzi zizkigun aukeran eta  horietatik aipatutako biak hautatu genituen. 

Hurrengo klase orduan, joko bat didaktikoa eta ona izan dadin bete behar dituen irizpideak zerrendatu genituen. Lan hau 

burutzeko, taldekide guztiek gure iritzia eman genuen horrela adostutako zerrenda bat osatzeko. Hala ere, gure ideiez gain testutako ideiak ere kontuan hartu genituen. Lan hori bukatu ondoren, jokoetara jolastu genuen eta guk ezarritako irizpideak zein neurritan betetzen zituzten aztertu genuen. Azken hau taula bat betez burutu genuen. 

Lan hau burutzeko ez genuen arazorik eduki baina irizpideak erabakitzerako orduan desadostasun txiki bat eduki genuen. Taldekide baten ustetan, joko didaktikoek talde lana bultzatu beharko lukete. Hori lortzea oso zaila zela iruditzen zitzaigun besteei, ordenagailutako jokoak normalean bakarka jolastekoak izaten baitira eta nahiz eta pertsona bat baino gehiago jarri   ordenagailu berean jolasten, ezin duzulako ziurtatu denek modu berean parte hartuko dutenik. Beraz, nahiz eta ideala litzatekeen jokoak talde lana bultzatzea, gure irizpide zerrendan ez jartzea adostu genuen.

Euskararen hedapena teknologia berrien bitartez

Artikulu hau aurkitu dugu interneten eta euskararen etorkizuna interesatzen zaigunez zuekin konpartitu nahi dugu:

Euskararen hedapena teknologia berrien bitartez
2003-07-09 / 07:01 / Ainhoa Beola Olaziregi
Euskal Herriko Unibertsitateak antolatuta, Teknologia berriak eta euskararen erronka: hizkuntza gutxituen hedapena teknologia berrien bitartez ikastaroa eman berria da XXII. uda ikastaroetan. Bertan, Teknologia berrien aurrean, euskararen eta hizkuntza gutxituen erronken inguruko mahaingurua antolatu da. Han esandakoak dituzu artikulu honetan bilduta. Mintegian, euskara aztergai izanda edo hizkuntza beikular izanda, lantzen aritu diren proiektuak eta sortzen ari diren erreminta zein aplikazioak ezagutu ahal izan dira. Era berean, euskararen eta hizkuntza gutxituen erronka, teknologia berrien aroan zein den, aztertu ahal izan da. Hizkuntzaren normalizazioan, eta euskararen normalizazioan, aspalditik lantzen hasiak izan gara hizkuntzaren ezagutza, bai hezkuntza sisteman integratuz, bai eta euskalduntze zein alfabetatzean arituz. Era berean, hamar urte badira lan mundua eta udalerrien hizkuntza-erabilerarekin lotuta euskalduntzen ere urratsak eman zirela. Hizkuntza bat normalizatuko bada, gizarteko esparru eta baliabide guztiak integratuz, hizkuntzaren presentzia bertan bermatzea ezinbestekoa da. Honengatik, teknologia berrien aroan bizi garen honetan, euskarak normalizazio prozesuari eutsi nahi badio bederen, erronka horri erantzun beharra dio. Horren lekuko izan dira mintegian zehar ezagutu ahal izan diren proiektu, euskarri eta aplikazio anitzak. Gaurko testu honetan mintegian zehar eta mahai inguruan jasotako emaitza eta ondorioak biltzen saiatu naiz. Euskararen egoera teknologia berriekiko aztertzeko garaian, Ahulezietatik abiatu ginen: Teknologien esparruan, hizkuntza nagusia ingelesa da. Honela, esparru honetatik kanpo, hizkuntza nagusi eta osasuntsuak direnak ere (gaztelera edo frantsesa, kasuko), teknologien esparruan hizkuntza gutxitu ari dira bilakatzen. Zer egin euskarak honen aurrean? Eta hizkuntza gutxituek? Bestetik, aplikazio, erreminta eta sistema teknologiko nagusiak, Japonek, EEBBek eta Alemaniak sortu eta komertzializatzen dituzte nagusiki, merkatu zabalean hedatu diren neurrian, leku gutxi laga dietelarik gainerako herrialdeei. Euskaraz, teknologia sortu da; edonola ere gazteak gara lan-esparru hau lantzeko garaian, eta beraz eskarmentu gutxi dugu. Honek, gehiegitan kalitate eskasaren sorrera ekarri du, kalitatearen aurrean lehentasuna sortzeak izan baitu. Merkaturatzeko ere arazoak ditugu, hedapena herrialde nagusien esku baitago. Honekin lotuta ageri da ere, merkaturatzeko, eta sortzeko ere neurri batean, estrategia definiturik gabe jardun dugula, momentuko beharrei erantzuten saiatuz. Sortzen duguna ere, barne-merkatuan ez da ezagutzera emanten ari; honela, erabiltzaile potentzial askok, jakin ere ez dakite zer ari den sortzen euskaraz edo euskararekiko aplikatuta. Aukerak aldiz honen guztiaren aurrean anitzak dira: Euskara hizkuntza konplexua izaterakoan, aplikazio konplexuak sortu behar izan dira. Garatutako metodologia hau, beste hizkuntzetara aplika daiteke, ezagutzaren transferentzia bultzatuz batetik, eta merkaturatzea bilatuz bestetik. Lan bikoizketa ekidin behar da, eta horretarako ezinbestekoa da euskarazko teknologia ikerketa, sorkuntza eta garapenaren sarea osatzea. Ikerketa eta garapena maila pribatuan ari da egiten batez ere, eta honek asko garestitzen du ikerketa eta garapen prozesua (zer esanik ez hedapen prozesua). Administrazio publikoen babesa ezinbestekoa da, finantziazioari dagokionean bereziki. Garapenaren momentuan, estrategiak zeintzuk diren definitu behar dira aurrez, eta horretarako merkatu-tendentziak aztertu beharko dira: teknologien behatokia sortuko bada, honek tendentzien berri eman ahal izango digu, eta honetan oinarrituta, merkatuen beharrei erantzungo dien teknologiak garatzeko egoeran aurkitu ahal izango gara. Kanpo-merkatura atera behar da, gure espazio propioa sortuz: hizkuntza gutxituetarako baliagarria izango den metodologia esportatuz, eta sortzen ari garen teknologia hedatuz. Horretarako, ezinbestekoa izango da kalitatezko aplikazioak sortzea. Honekin lotuta ageri da Internet munduan euskarak eta hizkuntza gutxituek izan beharko duten garapena: transferentziak, elkar ezagutzeak, sorkuntza eta merkaturatzea bera gauzatu ahal izateko. Gizartearen erronka ere hemen bada: kultura digitalaren gizarte-kultura indartu beharra dago, zer ari den sortzen ezagutaraziz, eta sortzen ari dena erabiliz. Hemen, barne merkatuaz ari gara beraz, garatu eta sareratu beharreko beste ildoa baita hau. (AINHOA BEOLA OLAZIREGI Eukal Herriko Unibertsitatearen XXII. Uda Ikastaroetako "Teknologia berriak eta euskararen erronka: hizkuntza gutxituen hedapena teknologia berrien bitartez" mintegiaren zuzendaria da eta ELHUYAR aholkularitzako kide)

Teknologia hezkuntzan

Bideo hau interesgarria iruditu zaigunez hemen eskuragarri jartzen dizuegu. Asko ikasi!





Eta hemen berriz gai berdinari buruzko beste bideo batzuk:

Teknologia berriei buruzko parodia: http://www.youtube.com/watch?v=ttIdqq1QVdc

Etorkizuneko hezkuntzari buruzko bideoa: http://www.youtube.com/watch?v=Uppyy6eRcBQ

Irakasgaien ordu banaketa

ZER EGIN DUGU?

Praktika hau hiru zati ezberdinetan banatua dago:

1) Lehenengo zatian, DBHko lehen zikloko irakasgaietan bost ordu gehigarri banatzea.

2) Ordu banaketa bati buruzko gure iritzia azaltzea.

3) Errefortzu orduak izeneko irakasgaia sortzeaz dugun iritzia ematea.

NOLA ANTOLATU DUGU LANA?

Eztabaida bat egin genuen galderak erantzuteko. Taldekide bakoitzak bere argudioak eta iritziak plazaratu zituen eta guztion artean, batzutan bozketa bidez, akordio batera iritsi ginen.

ARAZOAK?

Esan bezala eztabaidak sortu ziren taldekideen artean. Hasteko, erlijioa ikasgaiaren inguruan. Izan ere, ez baitgenekien zein eduki barneratzen zituen irakasgai horrek. Taldekide baten ustez, ikasgaiak etika barneratuko balu, astean eskainitako ordu kopurua egokia izango litzateke. Gauza bera, kristautasunean zentratu ordez, beste erligio batzuk ere jorratuko balitu, beste taldekide batzuen esanetan.

Tutoretzarekin ere eztabaida sortu zen batzuen ustetan irakasgai honi ordu gehiago eskaini beharko zitzaizkiolako. Ikasleak orientatzeaz gain, klaseko giroa hobetzen lagundu beharko luke tutoretzak (iradokizunak, bidaiak antolatu...).

Taldekide bat ordea, bere esperientzia txarra dela eta, tutoretza beharrezkoa ez dela zioen. Bere ustez, tutoretzarik ez balego, beste gai aberasgarriagoak landu beharko lirateke, etika adibidez. Arazo hau, borketa bidez konpondu genuen eta denon artean tutoretzari ordu bat gehiago ematea erabaki genuen.

Hurrengo arazoa plastika ikasgaiarekin sortu zitzaigun. Kasu honetan Arte Ederrak ikasi dituen teldekide bat izateak pisu handia izan du. Bere aburuz, gaur egungo hezkuntza sistema gehiago bideratzen da lan mundura eta ez ordea pertsonaren garapenera. Horregatik eman nahi zizkioten, berak eta beste batek, bi ordu plastikari.

Hirugarren bat dudan zegoen plastikari bi orduak eman edo ordu hauek plastika eta musikaren artean banatzearen artean. Izan ere, musikak ere pertsona garatzeko balio duela esaten baitzuen.

Azkenik, laugarren taldekide bat ez zegoen ados plastikari bi ordu oso ematearekin lan mundura begira jarriz ez zuelako natur, gizarte, etab. gisako asignaturak bezain garrantzitsu ikusten.

Beraz, akordio batera iristeko bost orduak ordu bateko saiotan banatu genituen eta, ahal zen neurrian, guztion gustura antolatu.

Beste bi ariketetan ez genuen arazorik izan erabateko adostasuna izan baikenuen.

Hezkuntza sistemari buruzko legedien arteko konparaketa

Jarduera honetan, Espainiar estatuko historian egon diren  hezkuntza sistemen legedien arteko konparaketa burutu dugu: LGE, LOGSE, LOCE eta LOE-ren artekoa. Taula batean elkartu ditugu legedi bakoitzari buruzko datu guztiak, hala nola, testuinguru soziala, helburuak, kurtsoen banaketa, erlijioa, etab. 

Egin genuen lehen gauza informazioa interneten bilatzea izan zen, garrantzitsua baita legedi bakoitza plazaratu zen garaiko testuingurua kontuan hartzea. Lau taldekide garenez eta lau legedi aztertu behar genituenez, bakoitza legedi batez arduratu zen. Ideia nagusiak jaso ondoren, elkarren artean komentatu genituen eta taula bat osatzen hasi ginen. Egun berean amaitzeko denborarik izan ez genuenez, hurrengo klase egunean bukatu genuen. Interneten bildutako informazioaz gain, irakasleak banatutako orrietan datorren kurtsoen banaketari buruzko informazioa ere erabili genuen. Gainera, LGE-en unibertsitatera sartzeko zein azterketa  gainditu behar zen jakiteko taldekide baten amari deitu genion. Izan ere, legedi hori indarrean zegoen garaian sartu baitzen unibertsitatera.

Jarduera hau burtzeko ez dugu arazorik eduki, alderantziz, taldearen antolaketa onak lana erraztu digu eta denboraz ere ondo ibili gara. Ez hori bakarrik, gure helburuetako bat taula zehatz eta argi bat egitea zen. Gure ustetan helburua lortu dugu. 

Ondorio bezala esan dezakegu jarduera honen edukiak ulertu eta ikasi ditugula. Horretarako denboraz ondo ibiltzea eta talde antolaketa ona izatea izan direlarik aspektu azpimarragarrienak.

Power Polita

Power Pointa

View SlideShare presentation or Upload your own.

Arratsaldeon denoi!

Bigarren jarduerari buruzko hausnarketa azalduko dizuegu ondorengo lerroetan.

Manuel Area Moreiraren teknologia berriei buruzko artikulua irakurri dugu taldekide bakoitzak bere etxean. Lehengo asteartean eta gaur (osteguna) artikulu hori laburtzen duen power pointa egin dugu.

Bai power pointa eta baita hausnarketa hau egiteko ere, lau klase ordu erabili ditugu. Lehendabizi eskema bat egin dugu diapositiba bakoitzean azaldu nahi genuenarekin. Eskema horren arabera hiru argazki moldatu ditugu aurkezpenean jartzeko. Lan hau bakoitzak testutik azpimarratutako ideiak aukeratuz eta batuz osatu dugu. Hasieran zirriborro moduan egin dugu power pointa eta behin testua osatu dugunean, itxura eman diogu lanari. Horretarako hondoa aldatu dugu kolore difuminatu baten laguntzaz. Gero letra mota eta hauen kolorea ere aldatu ditugu.

Asteartean ez genuen denborarik izan lana amaitzeko. Klasetik kanpo geratzeko arazoak ditugunez, gaur (osteguna) ikasgelan geratzea erabaki dugu greba eguna izan arren.

Hori horrela izanik, lauron artean blogerako testu hau osatzen ari gara.

Hurrenarte!¡!

1. jardueraren hausnarketa: Jarduera baten planifikazioa

Lau jarduera ezberdinen planifikazioa egin genuen, horietako bakoitza taldeko kideek ikasitakoari buruzkoa: Past Simple ( Itzulpengintza), marrazketa artistikoa (Arte Ederrak), landare eta animali zelulak (Biokimika) eta mitosia eta meiosiari buruzkoak (Biokimika).

Plangintza honetan, besteak beste, jarduera bakoitzaren helburu didaktikoak, metodologia eta edukiak landu ditugu.

Jarduera hau burutzeko lehenik bakoitzak "Kurrikuluaren planifikazio didaktikoa" izeneko testua irakurri zuen bere kabuz. Behin jarduera egiten hasi ginenean testuari buruzko zalantzak taldean argitu genituen.

Taldekide batek, Aloñak, bere planifikazioa aldez aurretik egin zuen. Taldean bere lana aztertu ondoren, egokia iruditu zitzaigunez, eredu moduan erabili genuen gainontzekoak egiteko. Taldekide bakoitzak gai bat aukeratu ondoren, atal bakoitzean idatziko genuena denen artean adostuz joan ginen; horrela, gai guztien planifikazioa batera eginez.

Bukatzeko denborarik izan ez genuenez eta klase ordutatik kanpo elkartzeko arazoak ditugunez, bakoitzaren jarduera etxean amaitzea erabaki genuen. Beraz, lanaren zati nagusiena klasean burutu arren, etxean bukatu dugu.

Jarduera burutzeko behar izan dugun denborari dagokionez, hiru ordu ingurukoa izan da (testua irakurri eta taula bete).

Taldekide bakoitzak besteei lan indibiduala internet bidez bidali diegu, horrela, guztiok izango dugu lan osoa. Bestalde, ikasturte amaieran jarduera guztiak biltzen dituen txostena entregatu behar dugunez, jarduera bakoitzeko lan guztiak batuko dituen arduradun desberdin bat egotea erabaki dugu.

Ez dugu bestelako arazorik izan.

Aurkezpena

Iepa! 

Bi egiatar, zumaiar eta irurar bat elkartu gara hezkuntza antolakuntza eta teknologia berrien ikasgaian. Ibilbide desberdinetatik gatoz eta IGZ ikastaro honetan egin dugu topo.

• Aloña Barandarain Zaldua Arte Ederretan lizentziatu berria da, 22 urte ditu eta Irurakoa da. 
• Eva Joyce Corresek Itzulpengintza ikasi du Bartzelonan, 23 urte ditu eta donostiarra da.
• Lorea Zabaleta Lopez eta Eider Aizpurua Alkezarrek berriz, Biokimika ikasketak burutu dituzte, 23 urtekoak biak, Lorea zumaiarra da eta Eider donostiarra.

Blog honetan ikasgai honetan burutuko ditugun jarduerak islatuko ditugu. Zuen gustokoak izango direlakoan zuen komentarioen zain gelditzen gara.